A Delegación do Goberno en Galicia tramitou 25.881 expedientes de denuncia interpostos durante o primeiro estado de alarma

13/05/2021

Desde hoxe funciona un plan de reforzo para continuar a tramitación urxente do resto de expedientes

Entre as denuncias tramitadas en Galicia, 12.218 tiveron proposta de sanción ou pago anticipado

O obxectivo dos controis durante o primeiro estado de alarma foi en todo momento asegurar o cumprimento das medidas adoptadas para dobregar a curva de transmisión da COVID-19 e garantir a saúde das persoas


A Delegación do Goberno en Galicia tramitou 25.881 actas de denuncia interpostas polas Forzas e Corpos de Seguridade durante o primeiro estado de alarma, que na Comunidade durou entre o 14 de marzo e o 14 de xuño de 2020. Trátase de expedientes iniciados pola Policía Nacional, Garda Civil, policías locais e Policía Autonómica.

As Forzas e Corpos de Seguridade interpuxeron 45.503 denuncias durante aquel periodo, cun 56,88% tramitado en Galicia. O dato inclúe as denuncias que non prosperararon, as que remataron con resolución sancionadora, as que teñen resolución de arquivo, as de pago anticipado e as 2.874 que están actualmente en trámite.

Foron 13.663 as denuncias que non prosperaron ou foron arquivadas. Outras 12.218 tiveron proposta de sanción ou pago anticipado. Ao no computar as denuncias que non prosperaron, o total de denuncias con trámite queda en 15.928, un 35% do total.

Por provincias, A Coruña sumou 16.774 denuncias, con 6.965 tramitadas (39,91% ou 26,33% sen engadir as que non prosperaron) e 2.566 que remataron con sanción. En Pontevedra acumularon 13.669 denuncias, das que xa tiveron trámite 8.487 (62,09% ou 51,92% sen as que non prosperaron) e 6.099 finalizaron con sanción.

Lugo tivo 7.605 denuncias no mesmo periodo, cun trámite que alcanzou 7.602 (99,96% ou 33,64% sen as que non prosperaron) e 1.944 sancións. Ourense, pola súa banda, sumou 7.455 denuncias, cun trámite de 5.971 (80,09% ou 24,9% sen as que non prosperaron) e 1.609 rematadas con resolución sancionadora ou pago anticipado.

Desde hoxe funciona un plan de reforzo para continuar a tramitación urxente do resto de expedientes. A Delegación do Goberno lembra que o obxectivo dos controis durante o primeiro estado de alarma foi en todo momento asegurar o cumprimento das medidas adoptadas para dobregar a curva de transmisión da COVID-19 e garantir a saúde das persoas.