Isabel Rodríguez anuncia que a Policía Nacional intensificará a vixilancia na zona da Rúa Nova, a petición dos hostaleiros

14/06/2021

 A subdelegada reúnese con representantes da Asociación Provincial de Hostalaría e con propietarios de negocios da Rúa Nova que se queixan de incumprimentos dalgúns locais da zona
 Isabel Rodríguez informa de que a Policía Nacional tramitou 41 denuncias a pasada fin de semana na cidade de Lugo
 Na xuntanza tamén se acordou que os hostaleiros presentarán un escrito detallando os problemas que lles prexudican


A subdelegada do Goberno, Isabel Rodríguez, anunciou que a Policía Nacional intensificará a vixilancia na zona na Rúa Nova, onde hai queixas sobre o funcionamento dalgúns locais que lle expuxeron representantes da Asociación Provincial de Hostalaría e de varios establecementos situados na zona.

 

A subdelegada, que mantivo esta mañá unha xuntanza cos hostaleiros, na que tamén participaron mandos da Policía Nacional e da Garda Civil, informou de que se vai reforzar a vixilancia na zona, dentro das competencias propias das forzas e corpos de seguridade do Estado, e deu conta de que, nos últimos días, xa se montou un dispositivo na zona que, entre outras cousas, realizou inspeccións sobre o cumprimento das normas sobre o uso da máscara e o consumo de tabaco.

 

Isabel Rodríguez detallou que na pasada fin de semana a Policía Nacional formulou 41 propostas de sanción na cidade de Lugo. Concretamente, 26 foron por non usar máscara e 15 por fumar sen respectar as distancias sociais. Ademais, entre o venres e o domingo a Policía Nacional efectuou na provincia 235 inspeccións en establecementos de hostalaría, das que 106 realizáronse en locais do municipio de Lugo.

 

Na xuntanza tamén se acordou que os hostaleiros presentarán un escrito coas queixas sobre os problemas existentes na zona da Rúa Nova ou en calquera outro punto da cidade ou da provincia derivados dos incumprimentos por parte dalgúns negocios que, segundo indican, estarían fomentando o consumo de alcol por parte de menores e contribúen a crear problemas de convivencia e agresividade.