A subdelegada do Goberno en Lugo destaca o dispositivo que haberá na provincia para as eleccións do 28 de abril
11/04/2019
345.037 lucenses están convocados a votar nas eleccións xerais, nas que se escollen 4 deputados e 4 senadores que representarán á provincia de Lugo nas Cortes Xerais
Nos 67 concellos da provincia haberá 541 mesas electorais e para formar as mesas foron elixidos 3.246 cidadáns
A subdelegada do Goberno, Isabel Rodríguez, destacou hoxe o importante dispositivo que se desenvolverá na provincia para garantir o proceso electoral do 28 de abril. Isabel Rodríguez explicou que nas eleccións xerais están chamadas a votar na provincia de Lugo 345.037 persoas, das que 278.291 son residentes nos 67 concellos e 66.746 residen no exterior.
Nestes comicios, os lucenses escolleremos 4 deputados no Congreso e 4 senadores. Na nosa provincia, son 12 as candidaturas proclamadas para o Congreso e outras 12 para o Senado.
Respecto da loxística preparada para a celebración das eleccións, a subdelegada do Goberno informou de que na provincia haberá un total de 541 mesas electorais. Ademais, imprimíronse un total de 3.000.000 de papeletas das distintas candidaturas que se presentan ao Congreso dos Deputados e 250.000 papeletas para o Senado.
Para formar as mesas electorais foron elixidos, mediante sorteos celebrados en todos os concellos da provincia, un total de 3.246 persoas. Ademais, 417 representantes da Administracións encargaranse de verificar a correcta apertura das mesas, resolver incidencias e recoller os datos do reconto do voto.
CALENDARIO ELECTORAL
A campaña electoral para as eleccións xerais desenvolverase entre os días 12 e 26 de abril. O día 27 de abril será a xornada de reflexión e as votacións terán lugar o día 28, entre as 9:00 e as 20:00 horas.
O prazo de solicitude do voto por correo está aberto ata o día 18 de abril e o envío dos votos por correo pode facerse ata o día 24 de abril.