Inicio > Delegacións > Delegacións do Goberno > Delegación do Goberno na Comunidade Autónoma de Galicia > Actualidade > Notas de Prensa > Notas > 2022 > FEBRERO > María Rivas destaca o excelente nivel de seguridade dos portos españois e sitúao como a mellor carta de presentación para os operadores

María Rivas destaca o excelente nivel de seguridade dos portos españois e sitúao como a mellor carta de presentación para os operadores

22/02/2022

O curso da Policía Nacional empeza hoxe e termina o xoves nas instalacións da Autoridade Portuaria da Coruña

María Rivas lembra a figura do falecido José Luís Balseiro, que impulsou o curso e era unha referencia en canto a seguridade portuaria en España

A subdelegada subliña o papel central que gañan os portos, con instalacións máis abertas á poboación ao buscar protagonismo nas cidades

A formación dos profesionais da seguridade é clave para o futuro das instalacións

A subdelegada do Goberno na Coruña, María Rivas, destacou hoxe o excelente nivel de seguridade dos portos españois e sitúao como a mellor carta de presentación para os operadores. Explicouno durante a inauguración do I Curso de Seguridade en Portos para Escala Superior da Policía Nacional.

María Rivas agradeceu á Xefatura Superior de Policía de Galicia e á Autoridade Portuaria da Coruña a celebración deste curso orientado a unha trintena de comisarios e comisarias de todo o Estado. A docencia empeza hoxe e termina o xoves.

María Rivas lembrou a figura do xefe superior de Policía falecido, José Luís Balseiro, que impulsou o curso e era unha referencia en canto a seguridade portuaria en España. “Porque o seu traballo para poder abrir hoxe este curso foi crucial. E o seu sinal está en cada unha das actividades que realizaredes”, destacou.

A subdelegada asegurou que “a protección ocupa un espazo cada vez maior entre as preocupacións da sociedade” e “o mantemento da seguridade pública é un elemento central no éxito da xestión da política portuaria”.

“Dispor de instalacións seguras no momento actual é a mellor carta de presentación das nosas instalacións portuarias fronte aos operadores nacionais e estranxeiros”, explicou sobre o excelente nivel de seguridade dos portos españois.

María Rivas subliñou o papel central que gañan os portos, con instalacións máis abertas á poboación ao buscar protagonismo nas cidades. “Os portos están a converterse en áreas de ocupación cidadá, con instalacións máis abertas á poboación, coa realización de actividades que van máis aló das meramente económicas”, proseguiu.

A formación dos profesionais da seguridade é clave para o futuro das instalacións. “A adecuada formación dos profesionais debe ser un dos elementos crave a coidar e promover. Por iso, celebro particularmente a organización de cursos como este que hoxe me permitides inaugurar”, concluíu.

Presidiron a inauguración do curso, xunto á subdelegada, o xefe superior de Policía de Galicia, José María Esteban; o presidente da Autoridade Portuaria, Martín Fernández; o comisario xefe de Relacións Institucionais e Internacionais, Jesús Montero; e o comisario xefe da área de Planificación e *Prospectiva, Eduardo Gutiérrez.