Maica Larriba trasládalle ao alcalde de Valga as múltiples oportunidades para as entidades locais abertas a través do Plan de Recuperación
07/02/2022
A subdelegada destacou o “papel fundamental que xogan os concellos na vertebración territorial e na mellora dos servizos públicos que se levará a cabo grazas aos fondos Next Generation”.
Pontevedra, 7 de febreiro de 2022.- A subdelegada do Goberno en Pontevedra, Maica Larriba, mantivo esta mañá un encontro de traballo co alcalde de Valga, José María Bello, e coa tenente de alcalde do municipio, Carmen Gómez, que tivo como eixo central afondar sobre as actuais posibilidades de aproveitamento por parte das entidades locais dos fondos do Plan de Recuperación Transformación e Resiliencia.
Así, Maica Larriba facilitoulles de primeira man toda a información a disposición da Subdelegación do Goberno en Pontevedra relativa ás diferentes convocatorias dos fondos Next Generation ás que pode optar o Concello de Valga e os demais municipios da súa mesma categoría. O rexedor valgués agradeceu a información trasladada pola subdelegada sobre a participación dos concellos no Plan de Recuperación, destacando as posibilidades de aproveitamento e aplicación que os distintos programas teñen para executar proxectos no concello de Valga.
O alcalde mostrou especial interese naquelas convocatorias dirixidas á mellora da eficiencia enerxética e á redución do consumo en edificios e infraestruturas públicas. No marco destes obxectivos, Maica Larriba explicou que permanecen abertas convocatorias como o Programa PREE 5000 para a rehabilitación enerxética de edificios, o Programa DUS 5.000 para investimentos en proxectos singulares de enerxía limpa, así como as achegas destinadas ao autoconsumo e ao almacenamento eléctrico ou ao fomento dos vehículos de recarga eléctrica.
A subdelegada do Goberno agradeceu o interese no Plan de Recuperación mostrada polo alcalde de Valga e fixo fincapé na aposta do Goberno de España pola “cogobernanza no avance dos fondos europeos que van transformar a provincia e toda Galicia”, ao tempo que destacou o “papel fundamental que xogan os concellos na vertebración territorial e na mellora dos servizos públicos que se levará a cabo grazas aos fondos Next Generation”.
Doutra banda, a reunión tamén serviu para falar sobre a evolución de diferentes cuestións e proxectos de competencia estatal no concello de Valga. Maica Larriba comprometeuse, a este respecto, a trasladarlle ao alcalde toda a información a disposición da Subdelegación do Goberno en Pontevedra e a seguir traballando para dar resposta canto antes ás necesidades formuladas polo municipio.